Kagabo Wilson, umukozi wa Digitech Solution Limited  afatanyije  n’ubuyobozi bw’akarere ka Nyabihu ndetse n’ubw’ingabo muri ako karere, yasobanuriye abari bitabiriye inama  ububi bw’agatara gacanwa hakoreshejwe peterori ndetse n’ubwiza bwo gukoresha Biogaz cyangwa se amatara akoresheje imirasire y’izuba.

Kagabo yasobanuye ibi mu rwego rwo kurebera hamwe uburyo agatara gakoresha peterori kasimbuzwa mu gihe cya vuba  biogaz cyangwa amatara akoresheje imirasire y’izuba ku baturage bo hirya no hino muri ako karere.

Mu gusobanurira abari bari aho, Kagabo yavuze ko uretse ko agatara k’umwotsi kangiza ibidukikije bitewe n’umwotsi wako,yongeyeho ko uwo mwotsi utorohera abawuhumeka kuko ushobora kubatera igituntu.  Wilson yanavuze ko no gukoresha inkwi nabyo atari byiza  kuko byangiza ibidukikije cyane cyane abaturage batema ibiti bigatuma imisozi yambara ubusa kikaba ari kimwe mu bituma isuri yibasira ubutaka.

Bitewe n’uko gucana inkwi ndetse n’akadadoba ari bimwe mu byangiza ubuzima bw’abantu ndetse n’ibidukikije, abayobozi b’imirenge bakanguriwe gushishikariza abaturage gukora imishinga yo gukora Biogaz mu ngo zabo. Yasobanuye ko iyo hakoreshejwe biogas inkwi zakoreshwaga zigabanuka ndetse bakanakuraho umuriro bacana batagombye gukoresha utudadoba.

Ibyo bizakorwa ku baturage boroye inka cyane cyane ko benshi mu baturage b’ako gace boroye. Ikindi ngo ku baturage batabasha kubona Biogaz nabo hari ubundi buryo bazakoresha bwatuma bava ku tudadoba ku buryo umuturage yagura itara rikoresha imirasire y’izuba rishobora kugurwa amafaranga agera ku 9000 ku buryo umuntu ashyira ku zuba rikisharijamo umuriro.

Uburyo bwo gukoresha Biogaz bushobora korohera aboroye mu karere ka Nyabihu kuko abayobozi bako bafasha abaturage kumenya abakeneye Biogaz maze bakababarura. Nk’uko Mukaminani Angela, umuyobozi w’akarere  wungirije  ushinzwe ubukungu, yabitangaje ngo  ku muturage  wujuje ibisabwa ngo Biogaz yubakwe iwe, Minisiteri y’ibikorwa remezo imutangira 50% y’ibyo asabwa. Ari nayo mpamvu ngo bagiye gushyira ingufu muri buri murenge mu gukangurira abaturage gukoresha BIOGAZ aho gukoresha inkwi cyangwa utudadoba.

SAFARI Viateur

Share This

• 
• 
• 
• 
• 
• 
• 
• 
• 
• 
• 

About the author

peter