Rwanda : Abatuye Cyabararika baravuga ko amazi meza aje gukemura ikibazo cy’umwanda

Home » News » Rwanda : Abatuye Cyabararika baravuga ko amazi meza aje gukemura ikibazo cy’umwanda

Rwanda : Abatuye Cyabararika baravuga ko amazi meza aje gukemura ikibazo cy’umwanda

Posted by: peter Tags: featured, Rwanda, Rwanda advantages, Rwanda cleanness, Rwanda EWSA, Rwanda infrastructure, Rwanda musanze, Rwanda People, Rwanda project, Rwanda water Posted date: December 9, 2012 | No comment

Abaturage batuye akagali ka Cyabararika, umurenge wa Muhoza akarere ka Musanze, baravuga ko amazi meza bari kwegerezwa azatuma baca ukubiri n’indwara ziterwa n’umwanda, bityo barusheho kugira amagara mazima.

Aba baturage bakaba babitangaje kuri uyu wa gatanu tariki 07/12/2012, mu gihe Ikigo cy’Igihugu gishinzwe ingufu, isuku n’isukura (EWSA) kiri gukwirakwiza imiyoboro y’amazi mu bice byose bigize ako kagali.

Munyakabuga Obed umwe mu baturage, avuga ko aya mazi aje kubagirira akamaro, kuko batazongera kurwangwa n’umwanda wo kumubiri, ndetse n’uwo mu gikoni, bityo bigatuma amagara yabo arushaho kuba meza kurushaho.

Mukanoheli Jacqueline, umuturage wa Cyabararika, avuga ko yiteguye guhita ayobora amazi mu rugo rwe, dore ko umuyoboro uzaca imbere y’inzu ye, bityo binamuruhure n’abana be urugendo bakoraga bajya gushaka amazi.

Ati: “Abaturage bazagerageza, uzajya abona ubushobozi azajya ahita akururira murugo iwe, kuburyo tuzajya tubona amazi atwegereye tutabanje kugenda urugendo rurerure”.

Mukiza Anaclet, umuyobozo wa EWSA ishami rya Musanze, avuga ko bitewe n’ubwiyongere bw’inyubako n’abaturage nyamara ibikorwa remezo bitiyongera, abatuye akagali ka Cyabararika baranzwe no kutagira amazi ahagije, gusa ngo iki kibazo cyaba kiri guhinduka amateka.

Ati: “Abaturage bo muri kariya kagali bamaranye igihe ikibazo cy’amazi, kuko bagiye batura ari benshi nyamara ibikorwa remezo bitiyongera. Mu igenamigambi twavuze ko twongera imiyoboro kuburyo abaturage babona amazi uko bayashatse”.

Avuga ko iyi gahunda yasabwe n’abaturage, kuko batabashaka kubona amazi ahagije, bitewe n’amatiyo mato, none ngo mu cyumweru kimwe, umuturage wa mbere ashobora kuba yatangiye gufata amazi ku matiyo mashya.

Haratenywaga gushyira amazi ku burebure bwa kilometero 2, ndetse ngo umuturage nta kindi asabwa, uretse kwishakira ibikoresho bimugereza amazi murugo, naho ubundi ibyo gukwirakwiza imiyoboro byakozwe na EWSA.